Däi Projektidee

In Sommer tweidiusenduntahne (2010) kummt säine Durchlaucht Fürst Ernst van Holstein-Schaumborg wia trügge när Schaumborg in säine eole Heimatstadt Bückeborg. När dreihunnertachtenachtzich Joahrn töiht hei wia up säin Schlott, un dat ganze Gefolge eok. Hei well trügge kuam, ümme Gericht te heoln, un allet, wat vertwiar is, wia inne Räige bringen. Et schall wia Frieden wiarn in säin Lanne. Bet vandärge is en seck uneins ärwa sau viale Sachen, däi ärwa-all passäiat. Dat Stritteböcken twischen Löijen un Börgermestern schall uphürn. Däi Afkärten up´n Amte schött ühre Arbaat wia vernünftig märken un däi Öllern schött seck trüggeheoln un seck nich jümmer mie däi Schaule anleggen. Däi Schaumborger schött wia te Riuhe kuam.

Ümme dat hen tekräigen un Frieden temärken, briuke wäi eine, däi dat kann un eok schaffet. Fürst Ernst kennt seck in Schaumborg iut, däi weit Bescheid. Hei kann tauhürn un seck däi Anliggen dürn Kopp geahn leaten. Säine Durchlaucht kann salomeonisch urdeilen, dorför was Fürst Ernst all freuher bekannt un wurd doamärls all veriahrt. Doamie, datt dat wat wärd, schött seck däi Stäidte un Dörper in Schaumborger Lanne un däi Vereine un Gemeinschaften doa up instelln, allet wat nöidich is, bäi säine Durchlaucht vör tebringen.

Däi Bürgerinitiativen un Straßengemeinschaften, Heimatvereine un Dorfgemeinschaften, Naturschützer, Ortsräte un Gemeindeverwaltungen schött seck Meuhe giawm un ühre Anliggen säine Durchlaucht in ührn Stäidten un Dörpern vördräigen, denn däi Fürst Ernst well sülms dür säin Land raasen un säine Ünnerdährn besoiken und seck däi Sachen anniahm. Wenn hei jäide Halwe anehürt hat, well hei en gerechtet Urdeil fällen. Dat kummt ärwa doa up an, wue däi Löije ühre Malessen vörbringet un wat se doatau teseggen het. ´N Hand an is et woll eok nöidich, datt hei seck däi Sache sülms ankiekt. Denn mott hei doa hennebrocht wiarn, doamie datt doa´n Enne rankummt.

Up jäiden Fall well Fürst Ernst seck doaran märken, säin gauen Närm gerecht tewiarn. Un weil hei seck giarne säinen Ünnerdährn wäiset un eok nich bange is, schött däi Gerichtsdärge biuten säin, dat alle doa hen kuam un ührne eok seihen kürnt. Un däi Löije iut Schaumborg witt Fürst Ernst bestimmt upsoiken un ührne, - wue et seck ehürt -, in Empfang niahm.

Vörräijers kuamt dortau in jäidet Dörp un jäide Stadt, ümme säine Durchlaucht an tekündigen un Baldachine un Telte up testelln. Doamie, datt däi Fürst ünnerwäigens nich verschmachtet, schött däi Löije för Äiten un Drinken sorgen, un Fürst Ernst mach giarn wat Gauet! Ärwa eok Musäik mach hei giarne hürn, wenn hei seck twischendür räißen daht.