Dat Jubiläum

In tweidiusenduntahne (2010) isset niegenhunnert Joahr here, datt däi Närme Schaumborg taun ersten Märle up eschriewn wurd. In ne eolen Chreonik iut´n twölften Joahrhunnert staht inne, datt däi Sassenherzog Lothar van Süpplingenborg, - däi was närher Kaiser Lothar III.-, däin Junker Adolf vanne Schaumborg Land egiawn hat: Dat würn däi Grärfschaften Holstein un Stormarn. Freuher heit sauwat „belehnt”. Schaumborg was man lütsch un bleoß eint van verzich Lännern wue vandärge Niedersassen van ewurn is. Ärwa Adolf, däi däi Schaumborg ebiuet hat, was nich dumm. Hei verfräije säine Geschwister und Kinner mie annern mächtigen Löijen. Doadür könn hei seck in Norddöitschland dürsetten. Grärf Adolf hat näije Stäidte annelecht un Land urboar emärket. Sau is iut säinen lütschen Lanne ne Grärfschaft ewurn.

En poar hunnert Joahr läiter, - Fürst Ernst was all 18 Joahr deote -, starv sesstahnhunnertverzich (1640) däi lessde Schaumborger Grärf, un mie ührne däi lessde van däin eolen Stamme. Niu wurd allet upedeilt: Däi Grärfschaft Holstein wurd när Dänemark verkofft. Däi Welfen kräigen eok wat aff, un iut däin Rest wurd däi „Grafschaft Schaumburg hessischen Antheils” un däi „Grafschaft Schaumburg lippischen Antheils” emärket. Schaumborg-Lippe was in niegentahnsten Joahrhunnert saugor Fürstentum un när niegentahnhunnertachttahne Freistaat. Schaumborg-Lippe was eint van däi veier Länner, wue niegentahnhunnertsessenverzich (1946) Niedersassen iut ewurn is.

Däi hessische Grärfschaft Schaumborg hüre seit achtahnhunnertsessensechzich (1866) tau Preußen. Wue se niegentahnhunnertsiabnsäibzich (1977) däin Landkreis Schaumborg up ebiuet hett, keimen däi eolen Landesdeile wia teheope.

Un düsse Geschichte, däi niu all niegenhunnert Joahr diuat, hat dortau ehulpen, dat däi Löije seck wollföihlt in Schaumborg un seck eok Schaumborger nennen dauet, egärl ob se niu in Stadthärgen, Rinteln, Bückeborg, Eilsen, Äiwankerken, Nenndörpe, Sassenhärgen un Ruanbarge wuahnt. Wenn Fürst Ernst iut däi Renaissance taun greoten Jubiläum in tweidiusenduntahne (2010) in iuse Täit kummt, draff hei seck all up „säine Fürstenkinner” freuen, däi ührne heochliawn leaten witt.